Առաջնեկի ծննդից հետո առաջ եկած ավելորդ քաշից ազատվելու համար Անժելան սկսում է լուծումներ փնտրել: Կարճ ժամանակ անց նա հիմնում է Երևանում այսօր արդեն յուրահատուկ կոնցեպտով հայտնի, առողջ սնունդ մատուցող գողտրիկ ռեստորանը՝ «Իթ ընդ ֆիթ»-ը (Eat & Fit), որտեղ կարելի է առողջ, համեղ սնվել և, ինչպես անվանումն է հուշում՝ բարեկազմ մնալ: 

«Առաջին հերթին կոտրեցի կարծրատիպը, որ առողջ սնվելը կարող է համեղ լինել: Երկրորդը՝ որ մայր լինելով՝ կարող ես մեծ հաջողությունների հասնել և ստեղծել քո աշխատանքը: Եվ, ամենակարևորը՝ որ միշտ ժամանակ կա քեզ համար»,- ասում է նա: 

Ռեստորանի խոհանոցում տիրող եռուզեռը, տրամադրությունը և յուրահատուկ մթնոլորտը Անժելիկային գերել էին դեռևս, երբ նա ընդամենը 15 տարեկան էր: 

«Հայրս Մոսկվայում ռեստորան ուներ: 16 տարեկանում արդեն հորս ռեստորանում մատուցող էի աշխատում և ամեն ինչին՝ ռեստորանային բիզնեսին, նրբություններին, ներսից էի ծանոթ: Հետո արդեն կրթություն ստացա, հմտություններ ձեռք բերեցի, որը և օգնեց հիմնելու «Իթ ընդ ֆիթ»-ը, իսկ հորս մահից հետո որոշեցինք տեղափոխվել Հայաստան»,-պատմում է Անժելիկա Իլյինիխը: 

Վերջին տարիներին թեև երևանյան ռեստորանային իրականության մեջ բազմաթիվ հետաքրքիր կոնցեպտով ռեստորաններ և ժամանցի հետաքրքիր վայրեր են բացվել, այնուամենայնիվ, մի քանի տարի առաջ «Իթ ընդ ֆիթի» համար ճանապարհ հարթելը, ինչպես Անժելան է պնդում, այնքան էլ հեշտ չի եղել:

Ասում է՝ դժվար էր Հայաստանում առողջ սննդի սրճարան բացել, քանի որ այստեղ այնքան էլ ընդունված չէր առողջ սննդակարգը, և մտածելակերպն այլ էր: Նա նշում է, որ երբ բացեցին ռեստորանը, շատերը մտածում էին, որ այստեղ միայն խոտ են տալիս, ու առողջ սնունդն անհամ է: 

«Գրեթե ոչ ոք չէր հավատում, որ սրճարանը կարող է հաջողություն ունենալ և թերահավատորեն էին մոտենում մեր գաղափարին»,- նշում է նա: 

Անժելան հիշում է՝ հեշտ չէր, եւ առնվազն մեկ տարի պահանջվեց, որ հաղթահարեն եւ առաջ շարժվեն: 

«Բարդ էր, խոհարար չէինք կարողանում գտնել, այն մթերքը, որ ուզում էինք օգտագործել, հարցազրույցի եկող խոհարարները չէին ընդունում: Շաուրմա, քաբաբ պատրաստող խոհարարների հետ երբ խոսում էիր ավոկադոյով աղցանի մասին, զարմացած նայում էին: Այդ հիմա է, որ գրեթե բոլոր վայրերում օգտագործում են ավոկադո կամ քինոա, իսկ առաջ նման բան հնարավոր չէր գտնել»,- այսօր արդեն ժպիտով է դժվարությունների մասին հիշում 34-ամյա Անժելան:

Արամի փողոցի մի անկյունում գտնվող Eat and fit փոքրիկ սրճարանում օրվա գրեթե բոլոր ժամերին մշտապես երիտասարդներ են, օտարերկրացիներ և, ընդհանրապես, առողջ ապրելակերպը և առողջ սնունդը գնահատող մարդիկ:

Ժամանակակից ձևավորմամբ սրճարանում հաճելի մթնոլորտ  է, բազմատեսակ բույսերի շնորհիվ բուրում է թարմությամբ, իսկ այցելուն առողջ սնվելու լայն ընտրություն ունի:

Գանգրակաղամբ (քեյլ), խնձոր և կիվի՝ Eat and fit-ի բրենդային սմուզին է, որը հաճախորդներին առաջարկվում է որպես առողջ սնունդ: Սա սրճարանի տիրուհու՝ Անժելիկայի ֆիրմային ըմպելիքն է սեփական բաղադրատոմսով: 

«Բացի սմուզիներից, մենք քեյլն օգտագործում ենք մեր գրեթե բոլոր աղցաններում, այն շատ օգտակար է: Իսկ մեր սմուզին շատ պահանջված է հաճախորդների շրջանում»,- պատմում է Անժելան և հավելում, որ քեյլը B-12 վիտամինի, բջջանյութի լավ աղբյուր է, բարերար ազդեցություն է ունենում նյարդային համակարգի վրա: 

«Այս ռեստորանը Երևանի կենտրոնում թաքնված իսկական գոհար է, որտեղ մատուցում են առողջ սնունդ, ուտելիքը հագեցնող է, ճաշացանկը՝ բազմազան»,- այցելուներից մեկի գնահատականն է ռեստորանին:

Մեկ այլ օտարերկրացի հաճախորդ էլ հավելել է. «Արդեն գիտեք, թե Երևան այցելելիս ուր գալ: Անպայման մտապահեք այս հասցեն»:

Իսկ մի այցելու էլ դժգոհել է և ամենացածր միավորը դրել՝ 1: «Սնունդը շատ լավն է, սակայն ռեստորանը փակվում է ժամը 22.00-ին, արդյոք սա և՞ս ռեստորանի մոտեցումն է, որ բարեկազմ մարդիկ 22.00-ից հետո չպետք է ուտեն»: 

Անժելան պատմում է, որ հենց բարեկազմ դառնալու մղումն է իրեն դրդել բացել առողջ սննդի ռեստորանը, իսկ առողջ սննդի սկզբունքները գործնականում կիրառելով ինքը եւս կորցրել է  26 կգ:

«Միշտ չէ, որ կողքիդ պետք է մեկը լինի, ինքդ քեզ վրա պետք է վստահ լինես: Իմ նիհարելու ճանապարհին հասկացել եմ, որ ես ինքս եմ իմ մոտիվացիան: Երբ հայելու մեջ տեսնում եմ իմ արտաքինը և հասկանում, որ հասել եմ ինչ-որ կետի, ուրեմն հանձնվել չկա, պետք է շարունակել: Ոչ ոք չի կարող կանգնել կողքիդ և ասել՝ դու կարող ես: Այո՛, շատ հաճելի է, երբ քեզ հավատում են, բայց դու ինքդ պետք է քեզ հավատաս, ինքդ քեզ օգնես, թե չէ այլ կերպ առաջ չես գնա»,- ասում է երիտասարդ ռեստորատորը:

Ուսումնասիրելով մարզական դիետոլոգիա, սննդագիտություն՝ նա կազմում է սրճարանի ճաշացանկը, խոհարարի հետ համագործակցությամբ տարբեր համերի  ու մթերքների համադրություններ անում: Եթե այդ համադրությունը համեղ չի լինում, փորձում են ստեղծել նոր համեր: Ասում է՝ ունեն մշտական հաճախորդներ, որոնց համար շատ հաճելի է, օրինակ՝ առավոտյան նախաճաշել Eat and fit-ում:

«Մեր ուտելիքների մեծ մասի և հատկապես նախաճաշի մեջ ավոկադո կա,- ասում է նա: — Ավոկադոն առողջ սննդի մեջ ամենաշատ օգտագործվող մթերքներից է, օմեգա 3-ի, օգտակար ճարպերի լավագույն աղբյուր»:

Անժելան նշում է այցելուների ամենանախընտրելի և սիրած ուտեստները՝ ավոկադոյի տոստ, ավոկադո բոլ, հավով բոլ, հնդկաձավարի լապշայով ուտեստ և այլ հետաքրքիր և օգտակար բաղադրիչներով ուտեստներ՝ հավի սուվլակի ծաղկակաղամբի խյուսով, հնդկաձավարի նուդլ բրոկոլիով և ավոկադոյով, կանաչ բուրիտո և այլն:

«Իթ ընդ ֆիթի» հիմնադիրը նշում է, որ երևանյան նորաձև և հետաքրքիր կոնցեպտներով սրճարաններով հարուստ իրականության մեջ փորձում են մրցակցության մեջ լինել՝ մշտապես ուշադրության տակ պահելով թե՛ ճաշացանկը, թե՛ ռեստորանի ինտերիերի գրավչությունն ու թարմությունը: 

«Եթե աշխատասեր ես, ապա շատ հեշտ է երազել, դնել նպատակ ու հասնել դրան: Չպետք է նստել ու ասել՝ չէ՛, ոչինչ չի ստացվի: Պետք է մարդն ունենա նպատակ, հավատա, որ նպատակին կարելի է հասնել ու շատ աշխատել դրա համար»:

---

Լրագրող՝ Հասմիկ Համբարձումյան

---